తెలంగాణలో ఆయిల్ పామ్ విప్లవం: నర్మెట్ట ఫ్యాక్టరీతో రైతు ఇంట 'సిరిమల్లెలు '!

​- బండి దుర్గా ప్రసాద్

​భారతదేశ వంట నూనెల దిగుమతి భారాన్ని తగ్గించి, రైతును పారిశ్రామిక భాగస్వామిని చేయడమే లక్ష్యంగా తెలంగాణ ప్రభుత్వం అడుగులు వేస్తోంది. ఈ క్రమంలో సిద్దిపేట జిల్లా నంగునూరు మండలం నర్మెట్ట వద్ద రూపుదిద్దుకున్న ఆయిల్ పామ్ ప్రాసెసింగ్ యూనిట్ కేవలం ఒక కర్మాగారం మాత్రమే కాదు, అది తెలంగాణ వ్యవసాయ ముఖచిత్రాన్ని మార్చే ఒక సరికొత్త ఆర్థిక విప్లవ కేంద్రం. మార్చి 22న ముఖ్యమంత్రి రేవంత్ రెడ్డి గారు దీనిని ప్రారంభించనుండటం రాష్ట్ర రైతాంగ చరిత్రలో ఒక మైలురాయి.

​ _ముఖ్యమంత్రి, మంత్రి తుమ్మల విజన్ - చైర్మన్ జంగా రాఘవ రెడ్డి కృషి_ 

​రాష్ట్రంలో 20 లక్షల ఎకరాల్లో ఆయిల్ పామ్ సాగు లక్ష్యంగా ప్రభుత్వం చిత్తశుద్ధితో పనిచేస్తోంది.

​ నిధుల వెల్లువ: ముఖ్యమంత్రి రేవంత్ రెడ్డి గారు వ్యవసాయాన్ని పరిశ్రమలతో అనుసంధానించాలన్న దృఢ సంకల్పంతో ఈ ప్రాజెక్టుకు నిధుల కేటాయింపులో ప్రాధాన్యతనిచ్చారు.

​చురుకైన పర్యవేక్షణ: వ్యవసాయ శాఖ మంత్రి తుమ్మల నాగేశ్వరరావు గారు క్షేత్రస్థాయిలో పర్యటిస్తూ, జాప్యాన్ని సహించబోమని హెచ్చరిస్తూ, ప్రభుత్వ రంగ సంస్థ అయిన ఆయిల్ ఫెడ్ (TG Oilfed) ద్వారా ఈ ప్రాజెక్టును పరుగులు పెట్టించారు. తాజాగా ఆయన సమీక్షా సమావేశంలో మార్చి 22న ప్రారంభోత్సవానికి ముహూర్తం ఖరారు చేశారు.

​ జంగా రాఘవ రెడ్డి గారి అంకితభావం: ఆయిల్ ఫెడ్ చైర్మన్ జంగా రాఘవ రెడ్డి గారు స్వయంగా రైతులతో మమేకమై, నర్మెట్ట ఫ్యాక్టరీ నిర్మాణాన్ని రికార్డు సమయంలో పూర్తి చేయడంలో కీలక పాత్ర పోషించారు. సిద్దిపేట, జనగామ జిల్లాలను ఆయిల్ పామ్ హబ్‌లుగా మార్చడంలో ఆయన కృషి చాలా వుంది.

​ నర్మెట్ట ఫ్యాక్టరీ: సాంకేతికత - గణాంకాలు 

​సుమారు 62 ఎకరాల విస్తీర్ణంలో, ₹300 కోట్ల భారీ వ్యయంతో నిర్మించిన ఈ మిల్లు ఆసియాలోనే అత్యంత ఆధునికమైనది.

​ సామర్థ్యం : ప్రారంభంలో గంటకు 30 మెట్రిక్ టన్నుల (TPH) సామర్థ్యంతో మొదలై, భవిష్యత్తులో 120 TPH వరకు విస్తరించేలా దీనిని రూపొందించారు.

​పర్యావరణ హితం: ఇక్కడ 4 మెగావాట్ల విద్యుత్ ఉత్పత్తి కేంద్రం (Captive Power) 'జీరో వేస్ట్' టెక్నాలజీతో ఇది పర్యావరణానికి మేలు చేస్తుంది.

​ మార్చి 20 నుండి 'రైతు మేళా' 

​కేవలం ఫ్యాక్టరీ ప్రారంభోత్సవమే కాకుండా, మార్చి 20 నుండి 22 వరకు మూడు రోజుల పాటు భారీ 'రైతు మేళా నిర్వహించాలని మంత్రి తుమ్మల నిర్ణయించారు. ఆధునిక వ్యవసాయ పద్ధతులు, ప్రభుత్వ పథకాలు మరియు ఆయిల్ పామ్ సాగులోని మెళకువలను రైతులకు ప్రత్యక్షంగా వివరించడానికి ఇది ఒక గొప్ప వేదిక కానుంది.

​ రైతులకు లభించే అక్షయ లాభాలు 

​ఆదాయం: వరి, పత్తితో పోలిస్తే పెట్టుబడి తక్కువ. ఎకరాకు ఏడాదికి ₹1.5 లక్షల నుండి ₹2 లక్షల నికర ఆదాయం రైతుకు లభిస్తుంది.

​ ప్రభుత్వ తోడ్పాటు: మొక్కలు నాటిన మొదటి 4 ఏళ్లలో నిర్వహణ కోసం ప్రభుత్వం ఎకరాకు సుమారు ₹52,000 రాయితీ ఇస్తోంది.

​మార్కెటింగ్: గెలలు కోసిన 24 గంటల్లోనే మిల్లుకు చేరడం వల్ల రైతులకు గరిష్ట ధర (OER బేస్డ్) నేరుగా అందుతుంది.

​ చివరగా... 

​నర్మెట్ట ఫ్యాక్టరీ ప్రారంభం తెలంగాణ రైతు పాలిట ఒక అక్షయ పాత్ర లాంటిది. సిద్దిపేట గడ్డపై చిగురించిన ఈ ఆయిల్ పామ్ విప్లవం రాష్ట్రవ్యాప్తంగా విస్తరించి, రైతును నిజమైన రాజుగా నిలబెట్టబోతోందని రాఘవ రెడ్డి గారు అంటున్నారు.  ప్రభుత్వ సంకల్పం, అధికారుల కృషి తోడైతే అన్నదాత ఇంట సిరిమల్లెలు పూయడం ఖాయం.

​ బండి దుర్గా ప్రసాద్ 

(వ్యాసకర్త సీనియర్ జర్నలిస్ట్ మరియు తెలంగాణ ఆయిల్ ఫెడ్ లైజనింగ్ ఆఫీసర్)